كل عام، عيد الأم يكون فرصة باش نعبروا على حبنا وتقديرنا للإنسانة لي سهرت الليالي، وضحات براحتها، ودايما كانت تفكر فينا قبل روحها. الأم هي السند لي واقف معانا فكل خطوة، لي فرحت لفرحتنا وبكات لحزننا، ولي عمرها ما بخلت علينا لا بحبها لا بدعواتها.
هاد النهار ماشي غير عادة، بل هو لحظة خاصة باش نفتكرو واش تدير الأم في حياتنا. قداش من مرة كانت محتاجة ترتاح وما قالتش؟ قداش من مرة تحملت الألم وما وراتناش؟ قداش من مرة كانت غارقة في همومها، وبابتسامة وحدة طمأنتنا؟
عيد الأم هو الفرصة لي نفتكرو فيها واش معناتها كلمة “أم”، ونردّو شوية من الحب لي عطاتهولنا طول العمر، بحنان، بتقدير، وبكلمة صادقة تجيب لها الفرحة من القلب.
💖 علاه عيد الأم مهم؟
الأم ماشي غير كلمة، بل هي الأمان، الحنان والقوة. ديما واقفة معانا فالأفراح وفالصعاب، تسمعنا، تنصحنا، وتعطينا قلبها بلا ما تستنى المقابل.
كبرنا ولا مازلنا صغار، حب الأم يبقى الضو لي ينور طريقنا. ولو أننا ساعات ننسى نقولوها، عيد الأم هو الفرصة لي نفتكرو فيها باللي هي أغلى إنسانة في حياتنا.
🎁 كيفاش نفرّحو الأم؟
الهدايا دايما زاهية، بصح لحاجة لي تفرّح الأم هي الإهتمام والتقدير.
هادي بعض الأفكار البسيطة بصح ليها معنى كبير:
- كلمة من القلب، رسالة ولا ڤيديو فيها مشاعرنا الصادقة
- ماكلة مليحة محضرة بالحب، بلا ما تخمم هي فوالو
- نهار تاع الراحة، سواء خرجة، جلسة في صالون تجميل ولا غير جلسة حلوة في الدار
- ألبوم ذكريات، صور وكلام زاهي على لحظات جميلة عشناها معها –
🌷 تحية لكل الأمهات
كاين لي عندو ميمتو قريبة ليه، يسمع صوتها كل يوم، يشم ريحة القهوة لي تحضرها، ويحس بالدفء تاع دعواتها. كاين لي بعيدة عليه، الظروف ولا الحياة فرقتهم، بصح الحب والاشتياق ديما حاضر، كل مكالمة تلفون تكون لحظة فرح، وكل كلمة “توحشتك” تخرج من القلب. وكاين لي ميمتو راها في القلب والذكريات، رحلات قديمة، ضحكات محفوظة في الذاكرة، وحنين كل مرة يطلّ وقت ما يشم ريحة حاجة كانت تعجبها، ولا يسمع أغنية كانت تفرح بيها.
عيد الأم هو نهار تاع الحب، نهار فيه الفرصة باش نقولوا كلمة شكر، باش نعيّشوا لحظات جديدة، ونذكّرو أمهاتنا باللي كاين ناس يحبوهم بلا حساب، بلا شروط، وبلا حدود.
ما نخليوش غير اليوم، كل يوم فرصة باش نقولو “ربي يحفظك ماما، ونحبك من قلبي“. 💐❤️