صباح لعروسة هو أول يوم أو بالأحرى أول صباح تقضيه العروسة الجزائرية مع زوجها.
حتى إذا كانت رغبتك الوحيدة هي البقاء مع الحبيب لازم عليك تنوضي وتوجدي روحك للقاء عائلة زوجك لأن العرس مازال ما خلاصش.
صباح العروسة له رمزية خاصة عند العائلات الجزائرية حيث تحيي هذه الأخيرة العادات والتقاليد الثرية التي تُعرف بها بلادنا.
ومنه الأسئلة لي تطرحها كل لعرايس هي:واش نديرو صبيحة لعروسة؟ واش لازم نلبسوا؟ وفطور لعروسة شكون يطيبو؟
كالعادة عرسي.كوم تجيكم بكل المعلومات اللازمة باش تعيشو عرسكم بدون قلق وبكل سلاسة.
صباح لعروسة : ملابس العروسة الزينة والتجميل
واش تلبس لعروسة صباح عرسها ؟
أولا وقبل كل شيء كي تنوضي صباح خوذي وقتك باش تستمتعي بالصبيحة الأولى تاعك لأنه يوم ما يتعاودش.
قبل ما تخممي فواش تلبسي باش تلاقي ضيوفك خممي على البدلة لي راح تصبحي بيها على راجلك.
عادة ما لعرايس يصبحو لابسات ديزابيي أبيض حريري و شعرهم يكون مطلوق و مرتب أو محكوم بطريقة طبيعية. يعني يخليو شعرات مطلوقة ما يزيدها أنوثة.
تقدري ديري ماكياج بسيط أو حتى الإكتفاء بأحمر الشفاه لكي تزيدي إشراقة لوجهك. تعطري وضعي كريمة لتغذية البشرة ولكي تكون لمساتك في غاية النعومة.
ما تنسايش تمديله هدية الزواج في الصبيحة إذا لم تهديه إياها في ليلة العرس.
وفي هذا الشأن إكتشفي مقال عرسي.كوم حول الهدية التي تهديها الزوجة لزوجها ليلة زفافهما.
راكي واجدة ومشاء الله عليك وضرك واش ديري ؟
إذا كنت أنت وزوجك في فندق ما عليك إلا الإتصال بخدمة الفندق باش تطلبي فطور الصباح و تستمتعي بيه مع راجلك فالسرير.
وفي حالة ما كنت في دارك مع زوجك يا إما تنوضي باش طيبي فطور الصباح لك ولزوجك، يا إما تنوضو بين زوج توجدُوه مع بعض أو تخرجوا تفطروا في كاش محل.
فيما يخص العرايس لي يعيشو مع عائلة الزوج، غالبا ما لعجوزة أو أخوات العريس يحضروا وجبة الفطور للعرسان الجدد.
صباح لعروسة : واش كاين بعد فطور الصباح؟
خلاص فطرتو بصحتكم، ضرك لازم توجدوا روحكم باش تخرجوا.
العادة تقول أن الزوج يدي عروسته لصالون الحلاقة قبل ما يروحو لبيت العريس لحضور وجبة الغذاء المحضرة خصيصا لهم.
لكن هذا سيناريو واحد ما بين العديد من الإحتمالات الممكنة.
كاين شي عرايس يفضلوا يمشطو و يتزينو في البيت أو غرفة الفندق عوض الذهاب لصالون الحلاقة.
وكاين لي يحضرو نفسهم و حقائبهم باش يروحو لقضاء شهر العسل بدون زيارة العائلة و مشاركة وجبة الغذاء.
صباح لعروسة : تصفيف الشعر والتجميل
السؤال لي يرجع دائما هو كيف تقوم العروسة بتصفيف شعرها و ما نوع الماكياج الذي تضعه ؟
الجواب هو كالآتي : طريقة تصفيف الشعر والتجميل يكون حسب ذوق العروسة. لا يوجد قوانين يجب اتباعها.
لكن من المستحسن إعتماد البساطة خاصة و أن مكياج و تصفيف الشعر يوم العرس يكون ثقيل و كثيف.
ومنه ننصحك بربط شعرك بطريقة شيك كيما يمكنك وضع أحد إكسسوارات الشعر لكي تباني عروسة.
أما في ما يخص المكياج إعتمدي الألوان الطبيعية كالزهري الفاتح، البيج والأحمر الأجوري.
خبراء التجميل لدى عرسي.كوم ينصحون بتركيز اللون الغامق في منطقة واحدة فقط : العينين أو الشفاه.
صباح لعروسة : واش تلبسي في هذه الصبيحة؟
إختيار البدلة يتوقف على برنامج اليوم.
إذا كنت في الفندق، في دارك أو حتى إذا كنت تسكني مع عجوزتك و رايحة تنظمي لوجبة الغداء المخصصة لك.
من المستحسن أن ترتدي بدلة بلون فاتح يلمح لفستان الزفاف.
تقدري تلبسي فستان، تنورة مع بلوزة، بدلة نسائية (كستم) أو حتى زيّ تقليدي جزائري بسيط و زيديلها كعب عالي و حقيبة يد شيك مع بعض الإكسسوارات.
إذا تزوجتي في فصل الشتاء زيدي معطف لونه بني فاتح أو بيج مع وشاح بلون فاتح هو الآخر.
وفي حالة ما تسافري مع زوجك لقضاء شهر العسل في داخل أو خارج البلاد صبيحة العرس، إعتمدي زي مريح يناسب طقس المكان الذي سوف تسافرون إليه.
صباح لعروسة : عادات وتقاليد الجزائريين في هذه الصبيحة
عادات الجزائريين في تحضير الأعراس تختلف في التفاصيل من منطقة إلى أخر إلا وأنها تتشارك الخطوط العريضة.
صباح لعروسة : من يحضر وجبة الغداء وما هو الطبق المُقدم؟
من يحضر وجبة غداء صباح لعروسة ؟
هذا يتوقف على العادة المتداولة بين العائلات. لكن للإجابة على السؤال كاين في بعض ولايات الوطن أين عائلة الزوجة هي لي تحضر وجبة الغداء وتديها عند عائلة الزوج أين يتناولها المدعوون.
وفي ولايات أخرى غرار الجزائر العاصمة، عائلة الزوج هي التي تتكفل بإعداد وجبة الغداء و يعرضو عائلة الزوجة وبعض المقربين لمشاركتهم الفرح.
في القديم كان الجزائريون يمارسون ما يعرف بالسبع أيام. عادة عتيقة لي بدات تروح والقليل هم من إحتفظوا بها لكم من المهم التكلم عليها.
تريد عادة السبع أيام أن في اليوم السابع بعد العرس تروح عائلة الزوجة
لبيت العريس ويدو معاهم كامل القضيان لإعداد وجبة الغداء.
مايلزمش يستعملو ولا مكون من عند بيت العريس إلا الأواني.
ويقال أن الفتيات العازبات هن من يقمن بطبخ الوجبة لإبهار أم كاش عازب بمهارات الطبخ الخاصة بهن عسى أن يكتب المكتوب.
فيما يخص اختيار طبق صباح لعروسة، تقوم العائلات بطبخ الأطباق التقليدية المعروفة بالمنطقة.
المثوم، الرشتة أو شطيطحة لحم بالجزائر العاصمة، رفيس الرنة واللبن في الشرق، الكسكس باللحم عند القبايل أو الشخشوخة في بسكرة وضواحيها على سبيل المثال.
صباح لعروسة : من عادات الجزائريين في مثل هذا اليوم
عادة الحزام العتيقة
تتمثل عادة الحزام في أن يقوم الزوج بربط حزام حول خصر العروسة كفال خير لكي تكون زوجته ولودة.
وفي بعض الولايات يقوم طفل صغير يبلغ عمره السنتين أو حتى أم العريس بربط هذا الحزام.
لبس ثوب الحماة
هنالك أيضا عادة جزائرية قديمة تقول أن صباح العروسة لازم ترتدي الزوجة فوق لباسها الجبة لي لبستها العجوزة نهار العرس ثم يجي طفل صغير يحزمها
وما هذه إلا لمحة خفيفة عن الثروة الثقافية التي تتميز بها الجزائر عبر كل أنحائها.
وأنتم ؟ كيف هي العادة عندكم في صباح العروسة؟
الأولى بعد الزواج. 