قطيع الشرط هي واحدة من مراحل الزواج في الجزائر وهي إحدى أهم العادات المتداولة بين العائلات في كل أنحاء الوطن.
ما هو تعريف عادة قطيع الشرط ؟ واش تلبس العروسة الجزائرية في هذا اليوم ؟ شكون تعرضي ؟ وغيرها من الأسئلة التي سوف نجيب عليها في هذا المقال.
قطيع الشرط في الجزائر : كل ما لازم تعرفيه حول هذه العادة
بين يوم الشوفة و الزواج كاين مراحل كثيرة يمر عليها العروسين ومن بينها و أهمها كاين مرحلة قطيع الشرط لي راح نتكلموا عليها اليوم.
تعرفوا أكثر على عادات الأعراس الجزائرية : تعليقة جهاز لعروسة، عادة من عادات زمان
تعريف عادة قطيع الشرط
يمكننا تعريف هذه عادة بطريقتين مختلفتين حتى أنهما تتفقان على نفس الأساس :
حسب العائلات و العادات المتداول عليها في أنحاء الوطن، قطيع الشرط هو اليوم الذي يتفاهموا فيه العائلتين على الصداق لي يجيبوه في الفيونساي.
كما يمكن أن يكون اليوم لي يجي فيه العريس و عائلته و يجيبو صداق العروسة و الذهب.
في هذه الحالة يتفق الجميع على تفاصيل الشرط في الخطبة، نهار يجيو بالحسب و النسب يخطبو بنتكم لامية لوليدهم أنيس.
تعرفي أكثر على الصداق في الجزائر: كم قيمته وكيفية إنفاقه
هل قطيع الشرط و الفيونساي نفس الشيء؟
قطيع الشرط و الفيونساي مرحلتين مختلفتين.
الأولى يجيبو فيها الشرط و الثانية يلبسوا فيه الخاتم و تولي العلاقة لي تربط لامية و أنيس رسمية قدام ربي و 
عباده.
هذا لا يمنع العائلات الجزائرية من إدماج المرحلتين والقيام بالواجب في يوم واحد فقط.
الهدف من هذا هو ربح الوقت و ينقصوا من الذهاب و الإياب عند عائلة الزوجة المستقبلية.
نصيحة عرسي.كوم للعرسان لي ما عندهمش الوقت أو لي يسكنو في ولاياتين مختلفتين و يكونوا بعاد على بعضهم. وهكذا ينقصوا من تعب ومشقة الطريق.
وقتاش تجي مرحلة قطيع الشرط؟
لو نتبعوا مراحل الزواج في الجزائر حسب العادات والتقاليد، هكذا تكون الأمور :
- الشوفة
- الخطبة
- قطيع الشرط
- الفيونساي و الفاتحة
- العقد
- العرس
ومنه، هذه المرحلة تحتل المرتبة الثالثة وتجي بين الخطبة و الفيونساي مع الفاتحة. علما أن هذا الترتيب يختلف حسب العائلات، الظروف و تفضيلات العروسين.
من المؤكد أنكم تتسائلون عن الفرق بين الخطبة و الفيونساس. مع أنه ليس موضوعنا اليوم راح نشرح هذه النقطة خاصة وأن قطيع الشرط يجي بين هاتين المرحلتين.
الخطبة هي المرحلة وين يجي العريس وعائلته أو يبعت أفراد من عائلته لطلب يد البنت لي حبها ورضاو عليها عائلته نهار الشوفة
أما الفيونساي هي مرحلة متقدمة وين الخطيب والخطيبة يلبسوا الخواتم و يحتفلوا مع العائلة و الأقارب بـ لابياس مونتي و العروسة تستلم الصداق و الشرط المتفق عليه.
زيادة على ذلك تقوم الكثير من العائلات الجزائرية بقراءة الفاتحة نهار الفيونساي.
كيفاش تستقبلي عائلة خطيبك في هذا اليوم؟
كيفاش تستقبلي عائلة زوجك المستقبلي يا لالة ؟ تستنايهم قدام الباب ؟ أنتي لي تفتحيلهم أو لا ؟ تخرجيلهم غير كي يلحقوا لداركم ؟ أو تصبري حتى يشربو القهوة ؟
أولا وقبل كل شيء ماشي العروسة لي تستقبل عائلة زوجها المستقبلي. هذا ماشي دورك أنتي ومنه تقدري تكلفي أختك، خالتك أو حبيبتك بهذه المهمة.
وقتاش تخرجيلهم ؟ ماكاش وقت محدد باش تخرج العروسة تشوف عائلة العريس و غالبا ما تجري الأمور كيما نهار الخطبة.
في أغلب الأحيان تخرج البنت في وقت القهوة و تجيب في يدها صحن حلويات باش ما تدخلش عليهم و يديها فارغين أي غير بلاطاي.
لكن في بعض الأحيان و حسب العائلات، يبعتو أخت العروسة، خالتها أو إحدى قريباتها باش يجيبوها.
واش تلبسي يوم قطيع الشرط؟
قبل ما تختاري واش تلبسي لازم تخلي في بالك أنك خلاص عجبتي عائلة الزوج ووافقوا عليك يعني ماكلاه تتقلقي 
و تزيدي عليها في اللباس والماكياج باش تعجبيهم .
راكي عجبتيهم و كملتي نهار الشوفة و زدتي نهار الخطبة. هذا لا يمنعك طبعا أن تتزيني.
ينصح فريق خبراء التجميل لدى عرسي.كوم أن تعتمدي البساطة والأناقة في الماكياج، تصفيف الشعر و اللباس وهذا في مختلف مراحل الزواج المذكورة سابقا.
واش تلبسي في هذا اليوم ؟ يعتمد هذا على واش راكي ناوية ديري : قطيع الشرط برك أوتزيدي معاه فيونساي ؟
إذا راكي معولة ديري قطيع الشرط وحده تقدري تلبسي قفطان شيك وبسيط، جبة أو منصورية بلون فاتح باش 
تباني عروسة أو اونسومبل أبيض أو بيج.
إكتشفي بعض فساتين خطوبة محتشمة للمحجبات
إذا ديرو لي فيونساي في نفس اليوم تقدري تلبسي فستان من نوع غوب برانساس بلون فاتح أو لباس تقليدي كالبدلة القبائلية أو الشاوية على سبيل المثال.
شكون تعرضي في قطيع الشرط؟
للإجابة على هذا السؤال لازم تعرفي إذا راكي رايحة ديري قطيع الشرط وحده أو تزيدي فيونساي و الفاتحة.
كما يعتمد هذا على رغبتك في أن ديري حفل صغير يضم المقربين أو وليمة كبيرة تعرضي فيها العائلة و الأحباب.
مهما كان خيارك كاين قائمة تاع أفراد العائلة لي لازم تعرضيهم لقطيع الشرط و هم كالآتي :
المدعويين من عائلة الزوجة
- الأب والأم، الإخوة والأخوات مفروغ منهم.
- كبارات العائلة كالجدة، الخالة و العمة أو زوجة الخال أو العم.
- إذا عندك قريبة أو صديقة مقربة ليك حبيتي تشاركيها الفرحة.
- إبن الخال أو العم في حالة ما كنتم غير بنات فالدار و ماعندكش خوك.
- الجد، الخال و العم أو كبار العائلة من الرجال باش يوقفوا مع الأب.
المدعويين من عائلة الزوج
لا يعود للعروسة أو عائلتها القرار فيما يخص المدعويين من عائلة الزوج. لكن وبصفة عامة الزوج يجي مع أهله و كبار العائلة من النساء والرجال.
هل حضور الرجال لازم يوم قطيع الشرط؟
هل لازم دعوة الرجال أم لا ؟ السؤال هذا يعود بقوة لذا قررنا الإجابة عليه في هذا المقال.
نعم، نعم ونعم يجب دعوتهم. بل حضورهم أهم من حضور النساء في هذا اليوم لأن قطيع الشرط يتم بين رجال العائلة.
بحضورهم يزيد الأمر مصداقية لأن الشرط المتفق عليه يعلنه أب البنت للزوج المستقبلي و أهله.
كانت هذه أجوبتنا على الأسئلة المطروحة من طرف أغلب البنات الجزائريات المقبلات على الزواج .
قولولنا ماهي عاداتكم في قطيع الشرط؟
No Comments